محمد یٰسین (لودھراں)

استاد ایک ایسی ہستی ہے جو حقیقت میں انسانوں کی تقدیر بنانے اور سنوارنے میں ہر وقت کوشش میں رہتا ہے۔ جب میں پانچویں کلاس میں تھا تو استاد صاحب نے ایک دن نعت پڑھاتے ہوئے بتایا کہ حضرت محمد ﷺ کی پوری زندگی معجزات سے معمور ہے لیکن دو باتیں جو پیغمبر ﷺ میں ایسی تھیں کہ آج ان کا پیغام کروڑوں نہیں بلکہ اربوں انسانوں تک پہنچ چکا ہے اور قیامت تک جاری رہے گا۔ ایک بات تو یہ ہے کہ ان کا پیغام سچا تھا اور اللہ کا پیغام تھا۔ دوسری بات پیغمبر ﷺ نے پوری ایمان داری سے اللہ کا پیغام لوگوں تک پہنچایا۔ استاد صاحب کی باتیں اس قدر پراثر تھیں کہ پوری کلاس پر خاموشی طاری ہو گئی تھی اور بات کانوں سے گزر کر دل میں اتر رہی تھی۔ سبق تو پورا ہو گیا۔ دن گزرتے رہے اور ایک دن ایسا ہوا کہ جیسے ہی میں صبح صبح سکول گیٹ سے داخل ہوا تو مجھے فرش پر گرے ہوئے پورے سات سو روپے ملے۔ میں نے اپنے ہاتھ میں اتنے سارے پیسے پہلی بار دیکھے تھے۔ میں تربیلا چک کے پاس جھگیوں میں رہتا ہوں اور میرا والد ٹانگوں سے معذور تھا اور گدھا ریڑھی پر صدا لگاتا تھا۔ میں بھی کبھی کبھی اپنے والد کے ساتھ چلا جاتا تھا لیکن اتنے پیسے پورے دن میں بھی نہیں بنتے تھے، سو روپے یا دو سو روپے بنتے جو گھر میں خرچ ہو جاتے۔ جب سے یہ نئے استاد صاحب آئے ہیں اس قدر شوق اور محبت سے پڑھاتے ہیں کہ میں نے اپنے والد صاحب کے ساتھ صدا لگانا چھوڑ دی ہے اور بلاناغہ سکول آتا ہوں اب میرا شوق محنت کر کے پڑھائی کرنا ہے۔ اس دن اتنے سارے پیسے دیکھ کر میرے دل میں کئی کئی خیالات پیدا ہو نے لگے  تھے لیکن میرےکانوں میں استاد صاحب کے وہ الفاط بار بار گونجنے لگے تھے کہ پیغمبر ﷺ سچے اور ایمان دار تھے۔ ہمارے پیغمبر ﷺ نے کبھی جھوٹ نہیں بولا۔ میں وہیں سکول  کے گراؤنڈ میں رک گیا اور استاد صاحب کے آنے کا انتظار کرنے لگا۔ استاد صاحب جیسے ہی سکول پہنچے، میں نے سارا ماجرا استاد صاحب کو سنایا۔ استاد صاحب نے وہ پیسے مجھ سے لے لیے۔ سکول میں اس بندے کو تلاش کر کے وہ پیسے اسے واپس کر دیے۔ استاد صاحب میرے اس کام سے نہ صرف خوش ہوئے بلکہ مجھے بہت سی دعائیں بھی دیں اور نصیحت کی کہ بیٹا! اسی طرح اپنی زندگی سچائی اور ایمان داری سے گزارو گے تو زندگی میں کبھی ناکامی کا سامنا نہیں کرو گے۔ الحمدللہ آج میں ساتویں کلاس میں پڑھ رہا ہوں اور شام کو استاد صاحب کے مشورے سے کام بھی سیکھ رہا ہوں۔ انشاءاللہ میں محنت مزدوری کر کے اپنی تعلیم پوری کروں گا اور اپنے استاد صاحب جیسا بنوں گا۔

شیئر کریں
  •  
  •  
  •  
  •  
  •  
  •  
  •  
  •  
  •  
  •  
85
5