جاگو جگاؤ

پیارے بچو! روشنی میگزین کا تیسرا باقاعدہ شمارہ آپ کی خدمت میں حاضر ہے۔ امید ہے آپ محکمہ تعلیم جنوبی پنجاب کی اس کاوش سے بھرپور انداز میں مستفید ہو رہے ہوں گے۔ یہ نومبر کا مہینہ ہے۔ اس مہینے کے حوالے سے اگر آپ سے کسی بہت اہم شخصیت کے بارے میں پوچھا جائے تو آپ کے ذہن میں کس کا نام آئے گا؟ کچھ غور کیا؟ اچھا اگر آپ سے پوچھا جائے کہ پاکستان کے سب سے بڑے شاعر کا نام بتائیے تو آپ کے ذہن میں علامہ اقبال کے سوا کسی اور شاعر کا نام  نہیں آئے گا۔ بڑی اور اہم شخصیت کی یہی پہچان ہوتی ہے کہ اسے یاد نہیں کرنا پڑتا، وہ ہمیشہ ذہن میں محفوظ رہتی ہیں، مثلاً قائد اعظم محمد علی جناح، شہید ملت لیاقت علی خان، شہید پاکستان حکیم محمد سعید اور فخر انسانیت عبدالستار ایدھی وغیرہ۔

برصغیر پاک و ہند میں مسلمانوں کو خواب غفلت سے بیدار کرنے اور تحریک پاکستان کے سلسلے میں علامہ اقبال کی خدمات ہماری تاریخ کا روشن باب ہیں۔ اردو شاعری کی تاریخ میں اقبال کے سوا کوئی ایسا شاعر نہیں جس کو فی الحقیقت تاریخ ساز کہا جا سکے۔ بچوں کے لیے خصوصی طور پر علامہ اقبال کے دل میں خواہش تھی کہ وہ ایک ایسی شمع کی مانند جلنا سیکھیں جو دوسروں کو روشنی دیتے ہوئے اپنا آپ ختم کر لیتی ہے۔ بچپن میں سکول کی اسمبلی میں علامہ اقبال کی دعا خوب زور و شور سے پڑھا کرتے تھے۔ جس کا ایک مصرع ‘زندگی شمع کی صورت ہو خدایا میری’ بھی تھا۔ ظلمت و جہالت کے اندھیروں میں اپنی شمع روشن رکھنے کے لیے ضروری ہے کہ ان اندھیروں سے لڑنے کا حوصلہ اور جذبہ موجود ہو اور یہ حوصلہ اور جذبہ اس وقت پیدا ہوتا ہے جب مثبت طرز فکر اور مثبت رویوں کو فروغ دیا جائے۔ نومبر 2021ء  کا یہ شمارہ  ہم اپنے اسی  عظیم شاعر کے نام کرتے ہیں۔

مثبت طرز فکر اور مثبت رویوں کی بات آئی تو دھیان فوراً کھیل اور کتب بینی کی سرگرمیوں کی طرف جاتا ہے۔ اس سلسلے میں بھی محکمہ تعلیم جنوبی پنجاب خاصا متحرک کردار ادا کر رہا  ہے کہ اس نے قومی کھیل ہاکی کے فروغ کے لیے پاکستان کی تاریخ میں پہلی بار سکولز ہاکی لیگ کا انعقاد کرایا اور نوجوان نسل میں علمی و ادبی روایت کے احیاء، کتب بینی اور قومی زبان اردو کی ترویج کے لیے سکولوں میں ‘فروغ’ کے نام سے ایک خصوصی پروگرام متعارف کرایا ہے۔

آپ بھی علم حاصل کرنے پر بھرپور توجہ دیجیے۔ علامہ اقبال جیسے بڑے لوگوں کے حالات زندگی پڑھیے اور ان کے نقش قدم پر چلنے کی کوشش کیجیے، انشاء اللہ آپ ضرور کام یاب ہوں گے۔

خوش رہیں، خوشیاں بانٹیں، پڑھیں اور پڑھائیں۔ علم اور کامیابی کی روشنی آپ کا مقدر بنے۔

شیئر کریں
  •  
  •  
  •  
  •  
  •  
  •  
  •  
  •  
  •  
  •  
  •